Ֆրանկո Մաստանտուոնոն հայտնվել է սկանդալի կիզակետում, որը կապված է «Կաստիլյա»–«Ռասինգ Ֆերոլ» հանդիպման (Primera RFEF-ի երկրորդ տուրի խաղ, նախատեսված սեպտեմբերի 7-ին, կիրակի, «Դի Սթեֆանո» մարզադաշտում) տեղափոխման հետ։

Նախորդ ուրբաթ «Ռեալ Մադրիդը» դիմել էր խաղի տեղափոխման խնդրանքով, քանի որ Ալվարո Արբելոայի թիմը լուրջ կորուստներ ուներ՝ կապված ֆուտբոլիստների հավաքականներ հրավերների և վնասվածքների հետ։

Ընդհանուր առմամբ, «Կաստիլյայի» կազմում բացակայում էին 11 ֆուտբոլիստ, ինչպես նաև Տիագո Պիտարչը, որը գրանցված է «Խուվենիլ Ա»-ում (հետևաբար նրա բացակայությունը «Կաստիլյայում» չի հաշվարկվում)։

Սակայն, ի տարբերություն Պիտարչի, Մաստանտուոնոն գրանցված է որպես երիտասարդական թիմի խաղացող, թեև նա երբեք չի խաղալու Արբելոայի գլխավորությամբ և «Ռեալ Մադրիդի» կայքում գրանցված է որպես առաջին թիմի անդամ։ Հետևաբար խաղի տեղափոխման համար նա համարվում է ևս մեկ կորուստ «Կաստիլյայի» կազմում։

Ակումբի համար անակնկալ էր, որ դա պետք էր պաշտոնապես հիմնավորել, քանի որ ֆուտբոլիստը հրավիրված էր Արգենտինայի ազգային հավաքական։ Արդյունքում Տիագո Պիտարչի բացակայությունը չի հաշվարկվում, իսկ արգենտինացունը՝ հաշվի է առնվում, ինչի հետևանքով «Կաստիլյայի» ընդհանուր կորուստները «Ռասինգի» դեմ խաղից առաջ հասնում են 12-ի։

Բացի Մաստանտուոնոյից, «Կաստիլյան» զրկվել է ևս 9 ֆուտբոլիստից, որոնք հրավիրվել են տարբեր հավաքականներ․ Ֆրան Գոնսալես (Մ21), Տիագո Պիտարչ, Ռաշադ, Կրիստիան Դավիդ, Դիեգո Ագուադո և Պոլ Ֆորտունի (Մ20), Ֆորտեա և Յանյես (Մ19), ինչպես նաև Լորեն Սունյիգա (Հասարակածային Գվինեայի ազգային հավաքական)։

Բացի այդ, Արբելոան կորցրել է ևս երեք ֆուտբոլիստի տարբեր ֆիզիկական խնդիրների պատճառով՝ Սեսար Պալասիոս, Դե Լյանոս և Մարիո Ռիվաս։ Այս ամենը «Ռեալի» երկրորդ թիմին կանգնեցնում է ծայրահեղ ծանր իրավիճակում՝ «Ռասինգի» դեմ խաղից առաջ։ Արբելոային մնում է ընդամենը 8 ֆուտբոլիստ, որոնք գրանցված են «Կաստիլյայում»․ Դավիդ Խիմենես, Մանու Սեռանո, Վալդեպենյաս, Լամինի, Ժոան Մարտինես, Սեստերո, Մանուել Անխել և Բրունո Իգլեսիաս։ Այս ցուցակը բավարար չէ անգամ մեկնարկային կազմ ձևավորելու համար՝ միայն երիտասարդական թիմի խաղացողներով։

«Ռասինգը» դեռևս մինչև պաշտոնական որոշման հրապարակումը հայտնել էր իր դժգոհությունը խաղի տեղափոխման կապակցությամբ։

«Մինչև չստանանք գրավոր հաստատում տեղափոխման մասին, մենք պատրաստվելու ենք խաղալ կիրակի օրը «Կաստիլյայի» դեմ։ Կարծում եմ, տրամաբանական կլիներ, որ հանդիպումը կայանար։ Նրանք պաշտպանում են իրենց իրավունքները, բայց մենք նույնպես պետք է մեր իրավունքները պաշտպանենք։

Ես կարծում եմ, որ խաղը պետք է տեղի ունենա։ Մեզ մոտ նույնպես կան հավաքականներ մեկնած խաղացողներ, և մենք կփորձենք հնարավորինս լավ ադապտացվել», – նշել է «Ռասինգի» գլխավոր մարզիչ Պաբլո Լոպեսը։