Մադրիդի «Ռեալը» պատրաստվում է ամառային տրանսֆերային պատուհանի ժամանակ վաճառքի հանել 8 ֆուտբոլիստի։

Defensa Central-ի հաղորդմամբ՝ դրանք կամ այն խաղացողներն են, ովքեր չեն ցուցաբերում պահանջվող խաղամակարդակ, կամ այն խաղացողները, ովքեր առանցքային չեն և կարող են զգալի գումար բերել տրանսֆերից։

Առաջին հերթին, տրանսֆերային ցուցակում կընդգրկվեն կենտրոնական հարձակվող Գոնսալո Գարսիան և եզրային հարձակվող Ռոդրիգոն։ Քննարկվում է նաև դարպասապահ Անդրեյ Լունինի, պաշտպաններ Ֆերլան Մենդիի և Ֆրան Գարսիայի վաճառքի հնարավորությունը, ովքեր գտնվում են Ալվարո Կարերասի ստվերում։ Ցուցակում են նաև կիսապաշտպաններ Դանիել Սեբալյոսը, Բրահիմ Դիասը և Էդուարդո Կամավինգան։

Այս խաղացողների վաճառքը պետք է զգալի տրանսֆերային գումարներ բերի և թեթևացնի աշխատավարձային ցուցակը։

Իսպանիայի առաջնությունում անցկացրած 16 հանդիպումներից հետո Մադրիդի «Ռեալը» մրցաշարային աղյուսակում զբաղեցնում է երկրորդ տեղը՝ վաստակած 36 միավորով։ Մրցաշարի առաջատարը «Բարսելոնան» է, որը 17 խաղից հետո ունի 43 միավոր։