Մարտին Էդեգորի տեղափոխությունն «Արսենալ» և Ֆեդե Վալվերդեի վնասվածքը Մադրիդի «Ռեալի» մալագացի կիսապաշտպան Իսկոյին իր կարգն ապացուցելու հնարավորություն են ընձեռել:
Այս պահին Իսկոն «Արքայական ակումբի» հիմնական երեք կիսապաշտպանների՝ Կրոսի, Մոդրիչի ու Կազեմիրոյի միակ այլընտրանքն Է:
Գաղտնիք չէ, որ Մադրիդի «Ռեալում» այժմ Իսկոյի լավագույն ժամանակահատվածը չէ: «Ռեալի» գլխավոր մարզչի պաշտոնը երկրորդ անգամ զբաղեցնելուց հետո Զինեդին Զիդանը, մեծ հաշվով, չի վստահում Իսկոյին՝ չտրամադրելով նրան բավարար խաղաժամանակ:
Չնայած նրան, որ Իսկոյի հեռանալը «Ռեալից» գնալով ավելի հավանական է դառնում, իսպանացի ֆուտբոլիստը մինչև ընթացիկ մրցաշրջանի ավարտը կկրի «Ռեալի» մարզաշապիկը, քանի որ Էդեգորն արդեն մեկնել է Լոնդոնի «Արսենալ»:
Իսպանական Marca-ն ավելի վաղ հայտնել էր, որ Իսկոն տեղեկացրել է թիմի ղեկավարությանը, որ ցանկանում է հեռանալ հունվարին: Ֆուտբոլիստի դիրքորոշումն ընկալելի է եղել նաև գլխավոր մարզիչ Զինեդին Զիդանի համար, որը չի փակել ելքի դուռը նրա առաջ:
Իրավիճակը, սակայն, հիմա փոխվել է, և Իսկոն պետք է թիմին գոնե մինչև հունիս՝ ամառային տրանսֆերային պատուհանը: Սա կլինի Իսկոյի ստացած ամենամեծ շանսն «Արքայական ակումբում»:
Fenomeno, Realmadrid.am