Իսպանիայի առաջնության 14–րդ տուրում Մադրիդի «Ռեալը» կհյուրընկալվի «Ժիրոնային» (01.12.2025, 00:00):

«Արքայական ակումբի» գլխավոր մարզչի նախախաղային մամուլի ասուլիսը.

«Վաղը մենք պետք է հաղթենք «Ժիրոնային»՝ միաժամանակ ցուցադրելով լավ ֆուտբոլ։ Մենք շատ ծանրաբեռնված օրացույց ունենք, ուստի հաղթանակը մեզ անհրաժեշտ է»։

«Ոմանք ասում են, որ «Էլչեի» դեմ խաղում մեր գոլերը չպետք է հաշվվեին։ Մենք կենտրոնացած ենք մեր խաղի վրա։ Ցանկանում ենք հաղթել՝ սպորտային առումով արժանապատիվ կերպով։ Յուրաքանչյուր խաղ մեր այս ձգտման փորձությունն է։

Վերջին շրջանում մենք լավ խաղային հատվածներ ունեցանք։ Բայց ես ցանկանում եմ, որ մենք էլ ավելի շատ գրոհենք, բարձր պրեսինգ կիրառենք, գերիշխենք և լինենք կայուն, հատկապես պաշտպանությունում, քանի որ մենք աշխատում ենք այդ գործոնի վրա։

Այնուամենայնիվ, ես դժգոհ եմ որոշ բաներից, հատկապես վերջին խաղերում բաց թողնված մեր գոլերից։ Մենք դեռևս գտնվում ենք գործընթացի մեջ»։

«Մթնոլորտը հանդերձարանու՞մ։ Ես միշտ զգացել եմ, որ մեր թիմը շատ համախմբված է, և որ մենք բոլորս գիտենք, թե որն է մեր նպատակը՝ պայքարել մինչև վերջ՝ ունենալով բոլոր տիտղոսները շահելու հնարավորություն։ Մենք միասին ենք և՛ հիանալի, և՛ ոչ այնքան լավ ժամանակներում։ Մենք ամենօրյա հիանալի կապ ունենք միմյանց հետ՝ չնայած մամուլում շրջանառվող լուրերին»։

«Ռյուդիգերը, Միլիտաոն և Մաստանտուոնոն վերադարձել են շարք։ Ֆրանկոն որոշ ժամանակ խաղում էր ցավերով, ուստի մենք որոշեցինք նրան հանգիստ տրամադրել։ Հիմա նա ցավեր չի զգում աճուկի հատվածում, ուստի մարզվում է ընդհանուր խմբում։

Հաուսենին ավելի շատ ժամանակ է պետք վնասվածքից ապաքինվելու համար։ Կարո՞ղ է արդյոք Ասենսիոն մասնակցել «Ժիրոնայի» դեմ խաղին։ Վաղը մենք կգնահատենք նրա վիճակը։ Հուսով եմ՝ Ռաուլը պատրաստ կլինի վաղվա խաղին»։

«Տրենտը բարձրակարգ ֆուտբոլիստ է։ Նա գիտի, որ կարևոր դեր ունի «Ռեալ Մադրիդում», նա մեզ պետք է։ Ներկայիս մրցաշրջանը նրա նորամուտինն է նոր ակումբում, ուստի նորմալ է, որ նա անցնում է հարմարվողականության շրջանով։ Տրենտն ինքն իր նկատմամբ պահանջկոտ է, և մենք պետք է աջակցենք նրան այս նշանակալի փոփոխությունների ընթացքում»։

«Մենդին հիանալի պաշտպան է, որը թիմին մեծ անվտանգություն է ապահովում պաշտպանությունում։ Նա շատ ուրախ էր կրկին մասնակցելու «Ռեալ Մադրիդի» խաղին, քանի որ շատ վաղուց դաշտ դուրս չէր եկել։

Ֆերլանը լավ տպավորություն թողեց ինձ վրա։ Մենք չգիտեինք, թե ինչ մակարդակով նա կկարողանա դրսևորել իրեն ՉԼ-ում, բայց նա հիանալի հանդիպում անցկացրեց «Օլիմպիակոսի» դեմ»։

«Բելինգեմը ցանկություն ունի նոր բաներ սովորելու և դաշտում ավելի արդյունավետ լինելու։ Ջուդն այն բարձրակարգ ֆուտբոլիստների տեսակին է պատկանում, որոնք նախաձեռնողականություն են ցուցաբերում առաջընթացի համար և կարող են տարբեր դերեր կատարել դաշտում»։

«Մբապե - Վինիսիուս կա՞պը։ Ակնհայտ է, որ նրանք շատ լավ են համագործակցում միմյանց հետ դաշտում։ Եվ դա վերաբերում է ոչ միայն «Օլիմպիակոսի» դեմ հանդիպմանը»։