Մբապեն ներկայացել է մամուլի ասուլիսի՝ «Ռեալ Մադրիդ» - «Մոնակո» խաղի նախորդ օրը, որը կկայանա այս երեքշաբթի «Բեռնաբեուում» (ժամը 23:55-ին):

Հարձակվողն իր խոսքը սկսեց աջակցության ուղերձով՝ ուղղված Կորդոբայում տեղի ունեցած գնացքի վթարի զոհերին և նրանց ընտանիքներին. «Ցանկանում եմ իմ զորակցությունը հայտնել Կորդոբայի բոլոր զոհերին։

Բոլոր այն ընտանիքներին, հայրերին, մայրերին ու եղբայրներին, ովքեր մարդիկ են կորցրել. մենք մտածում ենք նրանց մասին և հիշեք՝ կան բաներ, որոնք շատ ավելի կարևոր են, քան ֆուտբոլը»։

Այնուհետև Մբապեն պատասխանեց խաղի մասին հարցերին. «Մոնակոն» մի թիմ է, որն այժմ իր լավագույն վիճակում չէ, բայց Եվրոպայում նրանք գիտեն՝ ինչպես դիմակայել և լինել բարձրակարգ թիմ։ Մենք պետք է հենց սկզբից ագրեսիվ խաղանք, գնանք նրանց վրա. ուզում ենք հաղթել, որպեսզի հայտնվենք լավագույն ութնյակում։

Սա կարևոր խաղ է պահանջկոտ մրցակցի դեմ, և մենք խաղում ենք տանը՝ «Բեռնաբեուում»։ Բոլորը գիտեն, որ Չեմպիոնների լիգայի գիշերը «Բեռնաբեուում» առավելություն է մեզ համար, և մենք պետք է լավ հանդես գանք»։

«Բեռնաբեուի» սուլոցների մասին

«Նախքան ֆուտբոլիստ դառնալը, ես մի երիտասարդ էի, որը ֆուտբոլ էր դիտում, քննադատում ու կարծիք հայտնում։ Ես կարող եմ հասկանալ, որ սուլում են, քանի որ դա երկրպագուի ու մադրիդիստի համար սեփական կարծիքն արտահայտելու միակ հնարավորությունն է։

Լիովին հասկանում եմ սուլոցները, բայց եթե դա անում են, պետք է սուլեն ամբողջ թիմին, այլ ոչ թե միայն որոշ խաղացողների։ Մենք բոլորս ենք վատ խաղում։ Մենք ունենք բնավորություն և անհատականություն՝ դա դաշտում փոխելու համար։ Մադրիդիստները բարկացած են, բայց ես վստահ եմ, որ նրանք նորից կլինեն մեզ հետ»։

«Վինիսիուսի մեղքը չէ, որ մենք հիմա այսպես ենք խաղում։ Դա ամբողջ թիմի մեղքն է։ Սա միակ բանն է, որ պետք է ասեմ մադրիդիստներին։

Թող սուլեն ամբողջ թիմին, և մենք պետք է ընդունենք դա։ Դա մեր աշխատանքն է, և մենք պետք է փոխենք իրավիճակը։ Մեղքը բոլորինս է։ Մենք կանենք դա, որովհետև մենք «Ռեալ Մադրիդի» խաղացողներ ենք. միշտ լինում են նման պահեր, և մենք պատրաստվում ենք փոխել իրավիճակը»։